Hvað er Eurodesk?

Eurodesk var stofnað árið 1990 og er samstarfsnet sem hefur það hlutverk að miðla upplýsingum um tækifæri erlendis til ungs fólks í Evrópu. Í dag hefur Eurodesk stuðningshlutverk við Erasmus+ áætlunina og miðlar upplýsingum um hana til ungs fólks og þeirra sem starfa með ungu fólki. Eurodesk eru samtök sem eru ekki rekin í hagnaðarskyni.

Eurodesk notar ýmsa miðla til að vekja athygli á tækifærum til náms, starfsþjálfunar og sjálfboðaliðastarfa í í Evrópu. Æskulýðsstarfsfólk getur einnig notað sér víðfemt net Eurodesk til að finna tengiliði í öðrum löndum til að vinna saman að Evrópuverkefnum. 

Eurodesk er aðaluppspretta upplýsinga um Evrópustefnu í málefnum ungmenna en Eurodesk sér líka um að svara fyrirspurnum og hafa umsjón með efni á Evrópsku ungmennagáttinni. Fyrirspurnir er hægt að senda beint eða í gegnum gáttina en þjónustan er gjaldfrjáls. 

Með Eurodesk starfa yfir 1600 staðbundnar upplýsingaveitur, sem á ensku kallast „multipliers“ sem eru svæðisbundin eða staðbundin samtök sem vinna með ungu fólki, veita þeim upplýsingar og ráðleggja þeim um tækifæri erlendis. Þetta geta verið æskulýðsfélög, félagsmiðstöðvar, samtök, sveitarfélög o.fl. en þrátt fyrir fjölbreytni þeirra er kjarninn í verkefnum þeirra sem samstarfsaðilar Eurodesk sá sami.

Einnig eru til svokallaðir Eurodesk sendiherrar sem geta verið fólk eða samtök sem stuðla að dreifingu upplýsinga um Erasmus+ og önnur tækifæri án samninga við Eurodesk en nota og miðla upplýsingum frá Eurodesk.

Til að tryggja gæði þjónustu í öllum Eurodesk löndunum býður Eurodesk upp á þjálfun, stuðning og aðgang að upplýsingaþjónustu.